Enwyd oriel Abertawe mewn Oriel Gelf Gyfoes Genedlaethol newydd ar gyfer Cymru

Enwyd oriel gelf yn Abertawe yn bartner allweddol mewn Oriel Gelf Gyfoes Genedlaethol fawreddog ar gyfer Cymru.

Cyhoeddwyd Oriel Gelf Glynn Vivian Cyngor Abertawe fel un o naw oriel mewn rhwydwaith Oriel Gelf Gyfoes Genedlaethol ar gyfer Cymru – model ar draws y wlad sy’n ceisio cyflwyno casgliad celf cyfoes cenedlaethol i gymunedau ar draws y wlad, am ddim i bawb.

Mae hwn yn ymrwymiad allweddol o’r Rhaglen Lywodraethu Llywodraeth Cymru a’r Cytundeb Cydweithredu gyda Plaid Cymru. Mae’r ymrwymiad yn bosib drwy gydweithrediad rhwng tri phartner: Cyngor Celfyddydau Cymru, Amgueddfa Cymru a Llyfrgell Genedlaethol Cymru.

Mae’r prosiect blaenllaw cyffrous hwn ar gyfer Cymru wedi cael ei ddylunio i ehangu mynediad at gasgliadau celf sy’n eiddo cyhoeddus a chefnogi artistiaid sy’n byw ac yn gweithio yng Nghymru trwy ddarparu cyfleoedd comisiynu ac arddangos cysylltiedig.

Disgwylir i’r gwaith i sefydlu rhwydwaith o orielau ar draws Cymru gael ei gwblhau ar ddiwedd mis Mawrth 2025 a chadarnhawyd y rhwydwaith naw oriel fel a ganlyn:

• Canolfan y Celfyddydau, Aberystwyth
• Oriel Gelf Glynn Vivian, Abertawe
• Mostyn, Llandudno
• Amgueddfa ac Oriel Gelf Casnewydd
• Oriel Davies, Drenewydd
• Oriel Myrddin, Caerfyrddin
• Plas Glyn-y-Weddw, Pwllheli
• Canolfan Grefftau Rhuthun, Rhuthun
• Storiel, Bangor.

Meddai’r Cyng. Elliott King, Aelod Cabinet Cyngor Abertawe dros Gydraddoldeb, Hawliau Dynol a Diwylliant. “Rydym yn gyffrous iawn i fod yn rhan o’r prosiect arloesol hwn. Mae’n bleser i ni rannu casgliadau celf cyfoes Cymru gydag ymwelwyr gwybodus Oriel Gelf Glynn Vivian sy’n frwdfrydig dros gelf o bob math. Rydym yn edrych ymlaen at rannu casgliad anhygoel o waith celf gyda’n cynulleidfaoedd lleol amrywiol a gweithio gydag artistiaid, curaduron a chymunedau lleol ar arddangosfeydd a rhaglenni dysgu. Mae bod yn rhan o’r Oriel Gelf Gyfoes Genedlaethol ar gyfer Cymru yn gyfle gwych i bobl Abertawe.”

Meddai Cadeirydd Oriel Gelf Gyfoes Genedlaethol Cymru, Mandy Williams-Davies, “Gall celf gyfoes ein helpu i wynebu’r cwestiynau mawr ynghylch pwy ydyn ni fel cenedl, beth sy’n bwysig i ni ac i ba gyfeiriad rydyn ni’n mynd. Caiff celfweithiau o’r casgliad cenedlaethol eu benthyca a’u harddangos ar draws y rhwydwaith hwn; bydd comisiynau artistiaid a gweithgareddau allgymorth yn ymgysylltu â chymunedau’n lleol ac yn geneldaethol a disgwylir i gydweithio ar draws y rhwydwaith o bartneriaid gynyddu cyfleoedd ar gyfer datblygu’r sector a rhyngweithio cyhoeddus gyda chelf weledol.”

Mae adnodd ar-lein newydd Celf ar y Cyd yn parhau i dyfu fel rhan o Oriel Gelf Gyfoes Genedlaethol ar gyfer Cymru. Mae hyn yn rhoi mynediad at gasgliad digidol o gelf cyfoes y wlad yn syth, ac mae hynny’n hygyrch i unrhyw un, mewn unrhyw le, ar unrhyw adeg.

Mae’r oriel yn dathlu 25 mlynedd o Wobr Wakelin ar hyn o bryd gydag arddangosfa sy’n rhoi golwg yn ôl y wobr – mae’n dod â gwaith holl enillwyr y gorffennol ynghyd, ac mae ar gael i’w gweld tan 1 Medi 2024. Gweinyddir a chefnogir y wobr gan Gyfeillion y Glynn Vivian ac fe’i hariennir drwy roddion er cof am Richard a Rosemary Wakelin.

Mae celfweithiau dethol yn yr arddangosfa hon ar fenthyg gan Amgueddfa Cymru – Amgueddfa Genedlaethol Cymru fel rhan o’r fenter Oriel Celf Gyfoes Genedlaethol i Gymru, Celf ar y Cyd.

Mae datblygu Oriel Gelf Gyfoes Genedlaethol ar gyfer Cymru yn ymagwedd newydd at adeiladu proffil a hygyrchedd celf gyfoes yng Nghymru i sicrhau bod pawb yng Nghymru, a thu hwnt, yn gallu cael mynediad at gelf gyfoes Gymraeg mewn man corfforol a digidol.

Mae’n cynnwys rhwydwaith amrywiol o orielau ar draws 11 safle yng Nghymru, llwyfan digidol, a sefydliadau partner cenedlaethol, mae’n fodel unigryw, cenedlaethol a grëwyd ar y cyd a fydd yn cysylltu cymunedau ac artistiaid gyda’n casgliad cenedlaethol.