Dydd Gwener 23 Mai 2025 - Dydd Sadwrn 13 Medi 2025
10:30 am - 4:30 pm
Mae From Land to Fire yn cyfeirio at orffennol diwydiannol Abertawe: fe’i hadwaenid gynt fel Copropolis ac (fel Bombay, sydd bellach yn Mumbai, lle bu Chopra yn byw am flynyddoedd) roedd yn meddu ar borthladd hanfodol pan oedd yr Ymerodraeth yn ei hanterth. Gan ddefnyddio slyri o Waith Dur Port Talbot, sy’n newid i fodel newydd o gynhyrchu dur, mae Chopra yn cyfeirio at farwolaeth Cymru ddiwydiannol o bosib. Os yw tafod Chopra yn ei foch wrth gyfeirio at hoffter Glynn Vivian o wisgo i fyny, bydd hefyd yn gwisgo dillad gweithwyr diwydiannol – y glöwr, y gweithiwr dur, y gweithiwr ffatri – gan ddangos y tebygrwydd rhwng hanesion ymerodrol a diwydiannol Bombay ac Abertawe.
Hwyluswyd From Land to Fire (2025) drwy haelioni CELF Oriel gelf gyfoes genedlaethol i Gymru.
Am ddim
Mynediad am ddim, croeso i bawb
Mae arfer artistig Nikhil Chopra yn cyfuno darlunio, celf fyw, ffotograffiaeth, cerflunio a gosodweithiau. Mae ei berfformiadau, sy’n rhai byrfyfyr yn bennaf, yn ymdrin â hunaniaeth, hunangofiannau ac awduraeth, a hunanbortreadu, gan fyfyrio ar y broses o drawsnewid a rôl hyd yn ystod perfformiad. Mae Chopra’n cyfuno bywyd pob dydd, atgofion, a hanes ar y cyd – mae gweithredoedd dyddiol fel bwyta, gorffwys, ymolchi, gwisgo, darlunio a gwneud dillad yn dod yn elfennau hanfodol o’i gelf.
Yn y blynyddoedd diwethaf, mae darlunio a phaentio mewn stiwdio wedi dod yr un mor bwysig yn ei arfer wrth iddo barhau i archwilio’i berthynas â’r mynyddoedd a’r môr, gan fireinio ei waith, ei ddealltwriaeth a’i fedrusrwydd. Dechreuodd ei bresenoldeb mewn celf a theatr ryngwladol yn 2008 gyda gwahoddiadau i Time Crevasse (Triennale Yokohama), kunstenfestivaldesarts (Brwsel), Making Worlds (53ydd Biennale Fenis), Performa (New Museum, Efrog Newydd), a Marina Abramović Presents (Gŵyl Ryngwladol Manceinion, Oriel The Whitworth). Yn dilyn Cymrodoriaeth Ymchwil yng nghanolfan ymchwil Interweaving Performance Cultures yn Freie Universität Berlin yn 2011, dychwelodd Chopra i The Whitworth ar gyfer Gŵyl Ryngwladol Manceinion 2013 gyda’i waith ‘Coal on Cotton’ a enillodd glod y beirniaid. Rhwng 2014 a 2017, perfformiodd yn Biennale Kochi Muziris, Bienal de la Habana, 12fed Biennial Sharjah, a documenta 14. Yn 2019, cyflwynodd berfformiad unigol naw niwrnod o hyd, sef ‘Lands, Waters and Skies,’ yn yr Amgueddfa Gelf Fetropolitan yn Efrog Newydd. Ym mis Mawrth 2023, daeth Nikhil â chyfnod preswyl chwe mis i ben yn Art Explora, Cité Internationale des Arts ym Mharis. Yn dilyn hynny, ym mis Ionawr 2024 cyflwynodd berfformiadau unigol ar raddfa fawr yn Galleria Continua, Paris, a Chatterjee & Lal, Mumbai.
Ganwyd Nikhil Chopra yn Calcutta ym 1974 ac mae’n byw yn Goa ar hyn o bryd, lle mae’n cynnal HH Art Spaces gyda phartneriaid. Ar ôl cwblhau ei astudiaethau yn y Gyfadran Celfyddydau Cain ym mhrifysgol Maharaja Sayaji Rao yn Baroda, dechreuodd ei addysg bellach yn yr Unol Daleithiau, gan ennill gradd meistr o brifysgol Ohio State yn 2005. Mae Chopra a HH Art Spaces wedi’u cyhoeddi fel y curaduron ar gyfer y chweched Biennale Kochi Muziris sydd ar ddod yn 2025.
Categorïau
