Rydym yn falch o gyhoeddi bod Oriel Gelf Glynn Vivian Cyngor Abertawe wedi’i dewis i dderbyn cyllid gan y Loteri Genedlaethol drwy Gronfa Treftadaeth Sgrîn y BFI.
Bydd y prosiect yn helpu i sicrhau y caiff ffilmiau eu cadw yn y tymor hir yng nghasgliad parhaol yr oriel, ac y byddant yn hygyrch.
Mae’r celfweithiau hyn yn y casgliad yn dyddio o 1992 i 2024 ac maent wedi cael eu creu gan yr artistiaid cyfoes canlynol: Hetain Patel, Cinzia Mutigli, José Alejandro Restrepo, Tim Davies, Shimabuku, Peter Finnemore, Anthony Shapland, Jonathan Anderson, Helen Sear, David Cushway, Yingmei Duan, Ingrid Murphy ac Alexander Duncan.
Gan weithio gyda’r artistiaid, gwarchodwr cyfryngau seiliedig ar amser a thrwy hyfforddiant ymwybyddiaeth o hygyrchedd, nod y prosiect yw llunio disgrifiadau clywedol a dehongliad Iaith Arwyddion Prydain er mwyn amlygu unrhyw ofynion cadwraeth ac ehangu mynediad at y casgliad.
Rhan arall o’r prosiect yw creu ardal sgrinio yn yr oriel, a fydd yn caniatáu mynediad at y deunydd sgrîn hwn hyd yn oed pa na fydd yn cael ei arddangos dros dro mewn safle cadwraeth pwrpasol. Gellir gwneud apwyntiadau drwy e-bostio glynn.vivian@abertawe.gov.uk.
Fel rhan o’r prosiect hwn, bydd y tîm yn Oriel Gelf Glynn Vivian yn adolygu cynnwys archifol ac yn digideiddio deunydd perthnasol o bwys hanesyddol megis recordiadau sy’n benodol i’r oriel (teithiau o’r arddangosfeydd, cyfweliadau ag artistiaid a recordiadau o berfformiadau).
Gan ddechrau ym mis Ebrill 2026, bydd rhaglen ddysgu chwe wythnos i bobl ifanc, gan weithio gydag artist a gwaith sgrîn o’r casgliad. Bydd bwrsariaethau teithio ar gael, a darperir cinio i gyfranogwyr.
Bydd y prosiect yn gorffen gyda phum dangosiad hygyrch am ddim o waith yn y casgliad, gan gynnwys disgrifiadau Iaith Arwyddion Prydain neu ddisgrifiadau clywedol newydd eu creu yn theatr ddarlithio Oriel Gelf Glynn Vivian.
Mosäig Coffa Newydd i Drychineb Pwll Glo Elba wedi’i ddadorchuddio yn Nhregŵyr